老底子個老酒店(作者：鄭菁深 來源：新民晚報)

前些天讀了本版阿仁先生寫個《咪咪老酒和扳扳老酒》，有一眼同感，勾起了老底子酒店個回憶，蠻有味道個。
老底子勒辣上海個酒店邪氣邪氣多，小酒店可以講星羅棋布。譬如講大一點個酒店，除了淮海路浪個茅萬茂，有名氣個還有南京路浪個王三和，福州路浪個王寶和、高長興（高長興原先就辣上海舊書店迭個位置，後來關門，分店設辣延安東路雲南路口搭仔複興路靠近吉安路浪兩爿），以及河南中路南京路口個善源泰等等。聽老先生講，勒辣方浜西路西藏路口有一爿老酒店，店名交關風雅，叫“醉不歸”；勒辣建國東路，榮金大戲院（後改為建國電影院）隔壁有一爿老酒點，店名記不得了，店裏還豎起一塊匾牌，叫“太白遺風”。 　　
上海人吃老酒講法蠻多，喫老酒、嗒老酒、咪老酒、喝老酒。講到扳扳老酒，搿是近二三十年搿個講法，大多數是做小生意，打樁模子一幹人個切口。 　　
老酒店是市民休憩消閑，湊湊鬧猛個場所，各種各樣個人都有，工人農夫、知識分子、小老板、生意人，公務人員、作家、書畫家等等，勒辣搿搭講講張、拉拉家常、吹吹牛（勿是說謊話），交流各種信息，所謂“一杯在手，寵辱皆忘”，至於茄山河是現在個講法。 　　老酒店裏個故事實在忒多了，有機會可以請一眼老前輩多講講，也算留下一點老上海記憶。
一位老前輩講，老底子到酒店吃老酒真寫意，大（dhu）酒店像王寶和，有冷盆有熱炒，還可以叫跑堂到外麵飯店訂菜水，可以講服務到家了。等到結賬時，吃客會從袋袋裏摸出一本褶子，取下套子交撥跑堂，跑堂辣賬台對賬房先生高喊：“雷先生花雕四斤——”老吃客雷先生摜派頭答道：“寫五斤。”迭個一斤花雕鈿就算小賬了，到號頭浪一躉（den)當會鈔。迭個褶子就是現在信用卡個雛形，勿單單有錢人，一般職員也有，小時候辣抽屜裏發現父親也有，藍色個套子，外藍裏白個褶子，拉開來像手風琴。 　　
還有一隻故事我終身難忘。“文革”中，大小老酒店關個關、停個停，即使開了也大大縮水，像王寶和也勒出一塊店堂供應堂吃，二三樓都停業。勿要說熱炒，冷盆也隻有幾種。有一次筆者等幾個小年青到南京路上個新建酒店（就是老底子個王三和酒店）小聚。正好是上半日開門營業，店堂裏已有酒客勒辣小酌，阿拉幾個剛剛坐下來，看見扶梯浪走下來一個店員，手裏拿仔一本“紅寶書”。酒客見了統統起身，阿拉也莫名其妙站了起來。隻見迭個店員翻開“紅寶書”朗讀起來：“我們來自五湖四海，為了一個共同的革命目標走到一起來了……”吃老酒還要讀語錄？阿拉幾個也隻好跟著念，朗讀聲勒辣酒店回蕩。四十多年過去了，有時想起來就像昨日一樣。 　　現在上海灘浪傳統個老酒店一爿也嘸沒了，市民少了一個散心休閑個地方，也少了一個市井景觀，勿曉得阿是一個遺憾。
(成長於上海的我，對這類方言文字有著特別的興趣，知道有人會說“上海話有什麽了不起”？是沒說了不起，隻是從小說慣了的話，聽起來很親切，和廣東人愛聽廣東話東北人愛聽趙本山四川人愛聽四川話一模一樣。轉載者注）