2011 (1)
2016 (1035)
2017 (752)
2018 (978)
2019 (385)
2020 (175)
2021 (235)
2022 (101)
2023 (983)
整蠱專家https://www.youtube.com/watch?v=f4x4vw_p5bc
《整蠱專家》（Tricky Brains）係喺1991年出嘅香港電影之一，係香港導演王晶嘅搞笑作品。
電影資料[編輯]
製作[編輯]
背景及簡介[編輯]
故事係喺現代嘅城市裏麵發生，係講兩個後生仔因為整蠱嘅錯誤變成兄弟嘅故事。
劇情大綱[編輯]
故事開始時見到有個男人阿朱生推開一度寫住「整蠱專家」嘅門，點知佢有眼不識泰山唔知原來入麵睇緊報紙嘅後生仔就係自稱玉樹臨風嘅整蠱專家－－古晶，卒之俾古晶大肆整蠱，重將個朱生連人帶馬桶彈咗出屋外商場，搞到黐咗線；原來朱生本來想嚟搵古晶整蠱佢老婆朱太，搞到黐線之後咁離婚都唔使分身家，點知俾佢老婆捷足先登搵咗古晶，顯示出整蠱嘅實力並非浪得虛名。
一間企業嘅其中一個辦公室入麵，今日有班警察喺度搜職員嘅身，因為有個女職員懷疑俾人偷咗隻鑽石戒指，所以分開咗男同女兩邊排隊。車文傑返到嚟，照樣俾人叫咗去排隊，而搜女仔嗰邊已經搜曬，所以個女警就叫車文傑過去搜女仔身嘅房度進行搜身，阿傑俾女警搜身搞到好唔自然，點不知個女警忽然拉低件衫露曬胸咁嚟勾引佢，嚇到佢即刻縮埋牆角唔知點算，呢個時候，成班職員噴曬花條掟曬花紙碎咁一湧而入，原來成班人夾埋嚟整蠱阿傑嚟賀佢新升職做副經理，同佢一齊做嘢嘅老豆車親仁重開香檳嚟戥個仔高興。
阿傑同事沙漠超話策劃呢場整蠱騷嘅係一向多計嘅女同事BANANA，叫阿傑小心一不離二；轉個頭BANANA介紹咗個新女同事樂兒（Selina）畀阿傑，阿傑以為樂兒又係整蠱嘅一部份，所以對樂兒反整蠱將佢大肆奚落，搞到樂兒扯曬火咁走咗；後來阿傑知道咗原來係誤會，就追出去解釋，經過一番嘅唇舌之後阿傑終於氹得美人歸，跟住重拍埋拖。
有一日阿傑同樂兒經過一幅櫥窗，見到上麵噴咗「I♥U」三個符號，樂兒諗起識咗阿傑咁耐都冇聽佢講過呢幾個字，唔知阿傑係咪真心鍾意佢，於是要阿傑讀出嚟，點知阿傑都係冇講到。第二日，樂兒拍完拖之後，就使走阿傑話要同佢老友BANANA行街，兩個女仔一轉出街角就一齊走咗入架勞斯萊斯名貴房車入麵－－－原來樂兒就係車文傑個老細程運濤嘅女程樂兒，佢喺美國讀完書返香港，佢借加入老豆間公司幫手為名，實則係想搵個男朋友解嚇悶；不過樂兒真係鍾意咗阿傑，但係唔知阿傑個心係點，怕揭穿真相之後阿傑受唔住而會同佢分開。
其實樂兒已經有個男朋友叫金默基，佢係程運濤程老先生嘅得力助手，為人妒忌、陰濕；當佢知道咗樂兒想疏遠佢去同阿傑拍拖，就喺程老先生麵前猛打小報告大數阿傑，不過程老先生為人豁達，覺得阿傑係一個有為嘅後生仔，就不置可否繼續默許樂兒同阿傑一齊。默基見講是非起唔到作用，於是實行下一步嘅計劃。
一日，阿傑個老豆車親仁喺屋企煮煮嚇飯，突然佢嘅其中一個前度情人嚟到，講出原來以前同佢一夜情有咗嘅BB並冇落到，喺大陸生咗出嚟由家姐養育成人；因為近排攞咗單程証可以落嚟香港住，所以希望車親仁可以認返佢同埋照顧佢。舊情人帶車親仁去到一個破爛嘅單位，見車文晶未返嚟就暱埋喺布簾後麵等；阿晶返嚟之後，車親仁觀察到阿晶嘅小動作似足曬佢，而且又係好鍾意食臭豆腐同埋食得好辣，於是走出嚟相認，跟住就帶咗阿晶返屋企。阿傑無端端多個細佬覺得奇怪，於是提議佢老豆詐家依攞阿晶少少血嚟試嚇滴血認親，點知車親仁同阿晶兩滴血居然撈得埋，於是阿傑亦相信阿晶確係佢親細佬。
阿傑幫阿晶喺公司搵到份信差，不過第一日返工就俾沙漠超整蠱點咗佢入女廁，原來出名撐雞嘅BANANA喺裏麵化緊粧，佢見到阿晶走咗入嚟女廁就起勢鬧，點知倒轉俾阿晶用計仔呃佢入去男廁，化解咗沙漠超嘅整蠱。冇幾耐沙漠超見到全公司最霸氣最惡嘅女主任大白鯊入咗女廁，就借故話冇廁紙叫阿晶再入女廁一次，跟住開盤口同同事賭阿晶會幾耐出返嚟，如果安全冇事出嚟就一賠一百；阿晶入到去女廁即刻俾大白鯊揪住喊打，於是阿晶就即刻借勢撞埋牆之後扮死，大白鯊以為自己錯手殺咗人，於是扮到好鎮定咁行返出廁所當冇事；阿晶又化解咗一次整蠱，施施然咁行返出女廁，而車親仁就因為落注賭阿晶安全冇事而贏大錢。
中午，阿傑約咗樂兒同BANANA去餐廳食晏晝飯，BANANA見到阿晶都喺度，諗返起俾佢整返轉頭就好唔高興；席間阿傑同樂兒出咗去買嘢，剩低阿晶同BANANA，點知阿晶繼續整蠱BANANA，又話自己有愛滋病，又作勢要咬阿BANANA，嚇到BANANA喊曬走都走唔切，後尾去廁所重遇到爆水喉搞到變落湯雞。夜晚阿傑返到屋企，見到阿晶同老豆喺度做大戲，於是加入唱埋一份，要阿晶第二日襯BANANA生日上去佢屋企道歉。
阿傑同樂兒喺BANANA屋企同佢慶祝生日，著到靚一靚嘅BANANA收到束一百二十八枝嘅玫瑰，覺得身在美國嘅男朋友Julian好細心好溫馨；門鐘突然響起，BANANA以滿心以為Julian會突然出現畀個驚喜自己，點知企喺門外麵嘅原來係成身汙泥嘅阿晶；冇幾耐電話響，Julian喺電話入麵話因為喺美國識咗個新女朋友，而且就快要結婚，想同BANANA分手；差啲陷入崩潰嘅BANANA一個人走咗入熄曬燈嘅房度一邊喊一邊自言自語，點知突然發現有個人影喺間房度，原來阿晶喺度換緊衫，而且重講出咗束玫瑰其實係阿晶送嘅，因為用曬啲錢買花，所以冇錢搭車搞到行路嚟時跌咗落泥氹，BANANA聽到之後大為感動，兩人就冰釋前嫌。後嚟一行四人去到的士高散心，阿晶為咗氹BANANA開心，就去整蠱個光頭惡霸，後嚟車親仁又嚟加入玩埋一份，點知人哋人多勢眾，最終三父子俾人打咗一身。程老先生同金默基去到警局接返個女，同埋保釋車氏幾父子，金默基就乘機加鹽加醋話阿傑係黑社會唔係好人，不過程老先生仍然相信阿傑。
阿傑見阿晶唔嗲唔吊就勸佢正正經經上進，阿晶覺得要學阿傑咁一本正經唔難，反而認為阿傑學唔到佢嘅放浪不羈，於是兩人決定一人扮對方一日，睇嚇邊個先至有真本事。開始嘅呢一日，阿晶預先倒咗啲痕粉落阿傑條底褲度，跟住阿傑就著阿晶啲衫褲一齊爛撻撻咁出街；去到戲院大堂，阿傑痕癢開始發作，於是就暱埋一邊係咁抓係咁抓，點知呢個時候金默基帶咗樂兒嚟戲院諗住睇戲，阿傑嚇到擰歪麵扮睇唔到，最後有驚無險，樂兒一路都認唔出係佢；入到戲院坐定，阿晶將一早喺藥房買嘅催情春藥淫賤不能移混喺汽水入麵畀阿傑飲，搞到阿傑即時慶烚烚唔知點算，終於頂唔順彈起身，借勢對住樂兒當眾大聲表白，重反過嚟指金默基勾義嫂，搞到金默基喺戲院俾人打咗一身。呢個時候阿晶發覺，阿傑實在係一個冇乜機心嘅人，要整蠱到佢雞毛鴨血唔係咁易。
到咗第二日，阿晶著曬西裝扮佢阿哥，兩個人一齊返工。今日公司約咗日本個大客嚟簽十幾億生意嘅合同，點知臨開會前阿傑同程老先生飲咗阿晶暗中落咗藥嘅咖啡，搞到一齊去廁所，而金默基為配合阿晶亦都扮肚痛去埋一份，剩低阿晶去見幾個日本人。阿晶喺日本商人麵前係咁抬高價錢，重使用埋暴力，搞到個日本人焗住簽咗份不平等條約；程老先生返嚟見到咁嘅場麵直頭嬲到上心口，即時炒咗阿傑同阿晶，而車親仁因為覺得自己教子無方，冇顏麵賺埋嗰份退休金，唯有亦請辭一齊唔撈。
阿晶完成咗金默基嘅委託，於是返車家執包袱諗住走人，忽然阿傑同車老豆古古惑惑咁敲佢房門睇佢瞓未，佢以為事情已經敗露兩仔爺想搵佢尋仇，於是立住兩支羽毛球拍暱入被竇度詐瞓睇嚇佢哋想搞乜。夜深人靜，兩個人影加埋一支閃閃令嘅尖刀，慢慢咁潛咗入阿晶間房度，燈一開，阿傑同老豆對住阿晶大唱生日歌，車老豆手上重拎住個生日蛋糕，原來佢哋查到今日係阿晶生日，所以特登畀個驚喜佢；於是呢一晚，三仔爺又掟蛋糕又隊啤，最後三個都醉曬攤曬落床。天重未光，但係地方已經收拾乾淨，床上隻係剩返乾乾淨淨瞓到好香甜嘅車親仁同車文傑。
第二日，阿晶打電話去程氏集團搵金默基收埋啲尾數，點知咁啱BANANA撳錯咗條內線偷聽到佢哋對話。BANANA拎住支疊球棍，跟據金默基喺電話講嘅地址去到整蠱專家嘅辦公室，一推門就見到阿晶（古晶）走出嚟，於是係咁揮棍要打佢，不過打極都打唔到，搞到喘曬氣。阿晶氣定神閒咁解釋事情已經完結，唔會再搞車氏父子，但係BANANA想阿晶搵返車氏父子解釋同埋對付返金默基，不過阿晶話整蠱秘訣規定整咗人之後係唔可以返轉頭，若然違反毒誓就遭到可怕懲罰；經過討價還價之後，BANANA最後都說服到阿晶幫手。
BANANA同阿晶嚟到車宅，車親仁知道原來呢個親生仔係假嘅就好失望，不過亦都知道大家各為其主，所以亦都唔怪阿晶，但係要將件事解釋畀阿傑聽就好有困難，因為阿傑份人好硬頸，怕唔會原諒阿晶。阿傑搵唔到阿晶就返嚟屋企，見出麵行雷閃電就好擔心，車親仁襯機會就同佢講咗成件事嘅真相，阿傑聽完就發曬脾氣，重覺得老豆同阿晶夾埋嚟整蠱佢，於是走咗落街，咁啱樂兒企喺樓下，重有架勞斯萊斯喺側邊等，呢個時候阿傑終於知道原來樂兒就係老細個女，再一次嘅打擊搞到阿傑跌咗入萬丈穀底，一嬲之下走咗去。
呢一日，整蠱專家個招牌旁邊多咗塊好大嘅牌匾，上麵寫住「整蠱之霸」，阿晶以為係FANS送嚟嘅禮物，原來有個同行叫整蠱之霸正正喺佢隔離開咗間舖；兩個人見麵過咗兩招之後，金默基出現，原來佢搵咗整蠱之霸幫手，想令到車文傑冇得翻身，可以順利同樂兒訂婚。
車親仁同阿晶終於喺酒吧度勸掂阿傑，同佢去樂兒個訂婚PARTY度搵樂兒重修舊好。
呢一晚程家大宅衣香鬢影，而金默基亦聯同整蠱之霸佈好天羅地網，要阻止車文傑入場，但係車氏三人最終都成功咁混入程宅；默基見到阿傑同扮咗女人嘅老豆喺舞池度大跳勁舞，於是叫整蠱之霸出動；兩個整蠱界人物經過一輪互相鬥法，各出奇謀之後，阿晶終於得到最後勝利，而阿傑就成功奪得美人歸，重得到程老先生許可同樂兒結緍。
喺宴會嘅後花園，阿晶引見咗佢阿媽曼玉畀車親仁認識，點知兩個人一見麵就窒咗一嚇；原來曼玉又係車親仁嘅舊情人，而且又喺一夜情之後生咗個仔，呢個仔就係…
故事喺一聲「爸爸」之下結束。
主要出場人物同埋演出者[編輯]
