海上花列傳

第十八回 添夾襖厚誼即深情 補雙台阜財能解慍

　　按：陶玉甫聽得李漱芳咳嗽，慌忙至大床前揭起帳子，要看漱芳麵色。漱芳回過頭來眱了玉甫半日，歎一口氣。玉甫連問："阿有啥勿適意？"漱芳也不答，卻說道："耐個人也好個哉！我說仔幾轉，教耐昨日轉來仔末就來，耐定歸勿依我。隨便啥閑話，搭耐說仔耐隻當耳邊風！"玉甫急分辨道："勿是呀；昨日轉來末晚哉，屋裏有親眷來浪，難末阿哥說：'阿有啥要緊事體，要連夜趕出城去？'我阿好說啥 ？"漱芳鼻子裏哼的一聲，說道："耐覅來搭我瞎說！我也曉得點耐脾氣。要說耐外頭再有啥人來浪，故也冤枉仔耐哉。耐總不過一去仔末就想勿著，等耐去死也罷活也罷，總勿關耐事，阿對？"玉甫陪笑道："就算我想勿著，不過昨日一夜天，今朝阿是想著仔來哉。"漱芳道："耐是勿差，一 困下去，困到仔天亮末，一夜天就過哉。耐阿曉得困勿著了，坐來浪，一夜天比仔一年還要長點哩！"玉甫道："總是我勿好，害仔耐。耐覅動氣。"漱芳又嗽了幾聲，慢慢的說道："昨日夜頭天末也討氣得來，落勿停個雨。浣芳 出局去哉，阿招末搭無娒裝煙，單剩仔大阿金坐來浪打磕銃。我教俚收拾好仔去困罷，大阿金去仔，我一幹仔就榻床浪坐歇，落得個雨來加二大哉，一陣一陣風吹來哚玻璃窗浪，乒乒乓乓，像有人來哚碰。連窗簾才卷起來，直卷到麵孔浪。故一嚇末，嚇得我來要死！難末隻好去困。到仔床浪 ，陸裏困得著嗄，間壁人家剛剛來哚擺酒，豁拳，唱曲子，鬧得來頭腦子也痛哉！等俚哚散仔台麵末，台子浪一隻自鳴鍾，跌篤跌篤，我覅去聽俚，俚定歸鑽來裏耳朵管裏。再起來聽聽雨末，落得價高興，望望天末，永遠勿肯亮個哉。一徑到兩點半鍾，眼睛算閉一閉。坎坎閉仔眼睛，倒說道耐來哉呀，一肩轎子抬到仔客堂裏。看見耐轎子裏出來，倒理也勿理我，一徑望外頭跑，我連忙喊末，自家倒喊醒哉。醒轉來聽聽，客堂裏真個有轎子，釘鞋腳地板浪聲音，有好幾個人來浪。我連忙爬起來，衣裳也勿著，開出門去，問俚哚：'二少爺啥？'相幫哚說：'陸裏有啥二少爺嗄。'我說：'價末轎子陸裏來個嗄？'俚哚說：'是浣芳出局轉來個轎子。'倒撥俚哚好笑，說我困昏哉。我再要困歇，也無撥我困哉，一徑到天亮，咳嗽勿曾停歇。"玉甫攢眉道："耐啥實概嗄！耐自家也保重點個 。昨日夜頭風末來得價大，半夜三更勿著衣裳起來，再要開出門去，阿冷嗄？耐自家勿曉得保重，我就日日來裏看牢仔耐也無麽用啘。"漱芳笑道："耐肯日日來裏看牢仔我，耐也隻好說說罷哉。我自家曉得命裏無福氣，我也勿想啥別樣，再要耐陪我三年，耐依仔我，到仔三年我就死末我也蠻快活哉。倘忙我勿死，耐就再去討別人，我也勿來管耐哉。就不過三年，耐也勿肯依我，倒說道日日來裏看牢仔我！"玉甫道："耐說說末就說出勿好來哉。耐單有一個無娒離勿開，再三四年等耐兄弟做仔親，讓俚哚去當家，耐搭無娒到我屋裏向去，故末真個日日看牢仔耐，耐末也稱心哉。"漱芳又笑道："耐是生來一徑蠻稱心，我陸裏有故號福氣！我不過來裏想，耐今年廿四歲，再歇三年也不過廿七歲。耐廿七歲討一個轉去，成雙到老，要幾十年哚。該個三年裏向就算我冤屈仔耐也該應啘。"玉甫也笑道："耐瞎說個多花啥，討轉去成雙到老末就是耐啘。"漱芳乃不言語了。隻見李浣芳蓬著頭，從後門進房，一麵將手揉眼睛，一麵見玉甫，說道："姐夫，耐昨日啥勿來嗄？"玉甫笑嘻嘻拉了浣芳的手過來，斜靠著梳妝台而立。漱芳見浣芳隻穿一件銀紅湖縐捆身子，遂說道："耐啥衣裳也勿著嗄？"浣芳道："今朝天熱呀。"漱芳道："陸裏熱嗄，快點去著仔 ！"浣芳道："我覅著，熱煞來裏！"正說著，阿招已提了一件玫瑰紫夾襖來，向浣芳道："無娒也來哚說哉，快點著罷。"浣芳還不肯穿。玉甫一手接那夾襖替浣芳披在身上道："耐故歇就著仔，晚歇熱末再脫末哉，阿好？"浣芳不得已依了。阿招又去舀進臉水請浣芳捕麵梳頭，漱芳也要起身。玉甫忙道："耐再困歇 ，天早來裏。"漱芳說："我覅困哉。"玉甫隻得去扶起來，坐在床上，複勸道："耐就床浪坐歇，倪說說閑話倒無啥。"漱芳仍說："覅！"及至漱芳下床，終覺得鼻塞聲重，頭眩腳軟，惟咳嗽倒好些。漱芳一路扶著桌椅，步至榻床坐下，玉甫跟過來放下一麵窗簾。大阿金送上燕窩湯，漱芳隻呷兩口，即叫給浣芳吃了。浣芳新妝既罷，漱芳方去捕起麵來。阿招道："頭還蠻好來裏，覅梳哉。"漱芳也覺坐不住，就點點頭。大阿金用抿子蘸刨花水略刷幾刷，漱芳又自去刷出兩邊鬢腳，已是吃力極了，遂去歪在榻床上喘氣。玉甫見漱芳如此，心中雖甚焦急，卻故作笑嘻嘻麵孔。單有浣芳立在玉甫膝前，呆呆的隻向漱芳呆看。漱芳問他："看啥？"浣芳說不出，也自笑了。大阿金正在收拾鏡台，笑道："俚末看見阿姐勿適意仔也勿起勁哉，阿曉得？"浣芳接說道："昨日蠻好來裏，才是姐夫勿好啘，倪勿來個！"說著便一頭撞在玉甫懷裏不依。玉甫忙笑道："俚哚騙耐呀。無啥勿適意，晚歇就好哉。"浣芳道："晚歇再勿好末，要耐賠還個好阿姐撥倪。"玉甫道："曉得哉，晚歇我定歸撥耐個好阿姐末哉。"浣芳聽說方罷。漱芳歪在榻床上，漸漸沉下眼睛，像要睡去。玉甫道："原到床浪去困罷。"漱芳搖搖手。玉甫向藤椅子上揭條絨毯，替漱芳蓋在身上，漱芳憎道："重！"仍即揭去。玉甫沒法，隻去放下那一麵窗簾，還恐漱芳睡熟著寒，要想些閑話來說，於是將鄉下上墳許多景致，略加裝點，演說起來。浣芳聽得津津有味，漱芳卻憎道："撥耐說得煩煞哉，我覅聽！"玉甫道："價末耐覅困 。"漱芳道："我勿困著末哉，耐放心。"玉甫乃在榻床一邊盤膝危坐，靜靜的留心看守。但害得個浣芳坐不定立不定，沒處著落。漱芳叫他外頭去白相歇，浣芳又不肯去。

　　一會兒，大阿金搬中飯進房。玉甫問漱芳："阿吃得落？吃得落末吃仔口罷。"漱芳說："覅吃。"浣芳見漱芳飯都不吃，隻道有甚大病，登時發極，漲得滿麵緋紅，幾乎吊下眼淚。倒引得漱芳一笑，說浣芳道："耐啥實概嗄，我還勿曾死哩。故歇吃漱落末，晚歇吃。"浣芳自知性急了些，連忙極力忍住。玉甫因浣芳著急，也苦苦的勸漱芳多少吃點。漱芳隻得令大阿金買些稀飯，吃了半碗。浣芳也吃不下，隻吃一碗。玉甫本自有限。大家吃畢中飯，收拾洗臉。玉甫思將浣芳支使開去，恰好阿招來報說："無娒起來哉。"浣芳猶自俄延。玉甫催道："快點去罷，無娒要說哉。"浣芳始訕訕的趔趄而去。

　　浣芳去後，隻有玉甫、漱芳兩人在房裏，並無一點聲息。不料至四點多鍾，玉甫的親兄陶雲甫乘轎來尋。玉甫請進房裏，相見就坐。雲甫問漱芳："阿是勿適意？"漱芳說："是呀。"大阿金忙著預備茶碗，雲甫阻止道："我說句閑話就去，覅泡茶哉。"乃向玉甫道："三月初三是黎篆鴻生日，朱藹人分個傳單，包仔大觀園一日戲酒。篆鴻末常恐驚動官場，勿肯來，難末藹人另合一個公局，來哚屠明珠搭。勿多幾個人，倪兩家頭也來海。我為此先搭耐說一聲，到仔初三日腳浪，大觀園裏也勿必去哉，屠明珠搭定歸要到個。"玉甫雖諾諾連聲，卻偷眼去看漱芳。偏被雲甫覺得，笑問漱芳道："耐阿肯放俚去應酬歇？"漱芳不好意思，笑答道："大少爺倒說得詫異。故是正經事體，總要去個，倪阿有啥勿放俚去嗄？"雲甫點頭道："故末勿差。我說漱芳也是懂道理個人，要是正經事體也拉牢仔勿許去，阿算得啥要好嗄？"漱芳不好接說，含笑而已。雲甫隨說："我去哉。"玉甫慌忙直站起來，漱芳送至簾下。

　　雲甫踅出門外上轎，吩咐轎班："朱公館去。"轎班俱係稔熟，抬出東興裏，往東進中和裏。相近朱公館，朱藹人管家張壽早已望見，忙跑至轎前稟說："倪老爺來哚尚仁裏林家。"雲甫便令轉轎，仍由四馬路徑至尚仁裏林素芬家。認得朱藹人的轎子還停在門首，陶雲甫遂下轎進門。到了樓上房裏，朱藹人迎著，即道："正要來請耐。我一幹仔來勿及哉，屠明珠搭耐去辦仔罷。"陶雲甫問如何辦法。朱藹人向身邊取出一篇草帳道："倪末兩家弟兄搭李實夫叔侄，六個人作東，請於老德來陪客。中飯吃大菜，夜飯滿漢全席。三班毛兒戲末，日裏十一點鍾一班，夜頭兩班，五點鍾做起。耐說阿好？"陶雲甫道："蠻好。"林素芬等計議已定，方上前敬瓜子。陶雲甫收了草帳，也就起身說："我還有點事體，再見罷。"朱藹人並不挽留，與林素芬送至樓梯邊而別。素芬回房，問藹人："啥事體？"藹人細細說明緣故。素芬遂說道："耐請客末勿到該搭來，也去拍屠明珠個馬屁，阿要討氣。"藹人道："勿是我請客，倪六個人公局。"素芬道："前日仔倒勿是耐請客？"藹人沒得說，笑了。素芬複道："倪該搭是小場花，請大人到該搭來，生來勿配。耐也一徑冤屈煞哉，難末揀著個大場花，要適意點哚。"藹人笑道："難末真真倒詫異哉。我阿曾去做屠明珠，耐啥就吃醋嗄？"素芬道："耐要做屠明珠去做末哉啘，我也勿曾拉牢仔耐。"藹人笑道："我就勿說哉，隨便耐去說啥罷。"素芬鼻子裏哼了一聲，咕嚕道："耐末去拍屠明珠個馬屁，屠明珠阿來搭耐要好嗄。"藹人笑道："啥人要俚來要好？"素芬仍咕嚕道："耐就擺仔十個雙台，屠明珠也無啥希奇，搭耐要好末倒勿見好，情願去做鏟頭客人，上海灘浪也單有耐一個。"藹人笑道："耐覅動氣，明朝夜頭我也來擺個雙台末哉。"素芬呆著臉，也不答言。藹人過去攙了素芬的手，至榻床前，央及道："搭我裝筒煙 。"素芬道："倪是毛手毛腳，勿比得屠明珠會裝 ！"口中雖如此說，卻已橫躺著拿簽子燒起煙來。藹人挨在膝前坐了，又伏下身子向素芬耳朵邊低聲說道："耐一徑搭我蠻要好，故歇為仔個屠明珠，啥氣得來？耐看我阿要去做屠明珠？"素芬道："耐是倒也說勿定。"藹人道："我再去做別人，故末說勿定，要說是屠明珠，就算俚搭我要好末，我也勿高興去做俚。"素芬道："耐去做勿做關倪啥事體，耐也覅來搭我說。"藹人乃一笑而罷。素芬裝好一口煙，放下煙槍，起身走開。藹人自去吸了，知道素芬還有些芥蒂，遂又自去開了抽屜，尋著筆硯票頭隨意點幾色菜水。素芬看見，裝做不理，等藹人寫畢，方道："耐點菜末，阿要先點兩樣來吃夜飯？"藹人忙應說："好。"另開兩個小碗，素芬叫娘姨拿下樓去令外場叫菜。正是上燈時候，菜已送來，自己又添上四隻葷碟，於是藹人與素芬對酌閑談。一時複說起屠明珠來，素芬道："做倌人也隻做得個時髦，來哚時髦個辰光，自有多花客人去烘起來。客人末真真叫討氣，一樣一千洋錢，用撥來生意清點個倌人，阿要好？用撥仔時髦倌人，俚哚覺也勿覺著。價末客人哚定歸要去做時髦倌人，情願豁脫仔洋錢去拍俚馬尼。"藹人道："耐覅說客人討氣，倌人也討氣。生意清仔末，隨便啥客人巴結得非凡哚，稍微生意好仔點，難末姘戲子、做恩客才上個哉，到後來弄得一場無結果。"素芬道："姘戲子多花到底少個，故也覅去說俚哉，我看幾個時髦倌人也無啥好結果，耐來裏時髦辰光，揀個靠得住點客人嫁仔末好哉啘，俚哚才勿想嫁人，等到年紀大仔點，生意一清仔末，也好哉。"藹人道："倌人嫁人也難，要嫁人陸裏一個勿想嫁個好客人？碰著仔好客人，俚屋裏大小老婆倒有好幾個來浪，就嫁得去，總也勿稱心個哉。要是無撥啥大小老婆末，客人靠勿住，拿耐衣裳、頭麵才當光仔，再出來做倌人。夷場浪常有該號事體。"素芬道："我說要搭客人脾氣對末好，脾氣對仔，就窮點，隻要有口飯吃吃好哉。要是差仿勿多客人，故末寧可揀個有銅錢點總好點。"藹人笑道："耐要揀個有銅錢點，像倪是挨勿著個哉。"素芬也笑道："噢唷！客氣得來！耐算無銅錢，耐來裏騙啥人嗄？"藹人笑道："我就有仔銅錢，脾氣勿對，耐也看勿中啘。"素芬道："耐說說末就說勿連牽哉。"隨取酒壺給藹人篩酒。藹人道："酒有哉，倪吃飯罷。"素芬遂喊娘姨拿飯來，並令叫妹子翠芬來同吃。娘姨回說："翠芬吃過哉。"藹人、素芬兩人剛吃畢飯，即有一幫打茶會客人上樓，坐在對過空房間裏，隨後複有叫素芬的局票。藹人趁勢要走，素芬知留不住，送至房門。藹人下樓登轎，徑回公館。次日晚間，免不得請一班好友在林素芬家擺個雙台，不必細說。

　　至三月初三，十點鍾時，朱藹人起來，即乘轎往大觀園。隻見門前掛燈結彩，張壽帶著緯帽迎見，稟說："陳老爺、洪老爺、湯老爺才來裏哉。"藹人進去廝見，動問諸事，皆已齊備。藹人大喜，乃說道："價末我到該首去哉。此地奉托三位。"陳小雲、洪善卿、湯嘯庵都說："應得效勞。"當時藹人複乘轎往鼎豐裏屠明珠家。

　　第十八回終。