周立波額樣子,勿是像電影明星一樣額帥。伊有伊額特點,儂看:伊額頭發,頭勢清爽,油光光,格叫蒼蠅打活特:)四方臉,兩根眉毛呈八字形,嘴巴笑起來往下拐,有辰光還要舌頭溻溻,肩革聳聳,一付賊特兮兮額樣子,嘿嘿,格種樣子是蠻能夠吸引小姑娘額,當然,阿拉老早已經是老菜皮勒:))
本身哪,偶是勿打算再看額,結果,阿拉窩裏廂額老金倒去看勒,還港蠻有勁額。格記勿對來,老金勿是上海寧,伊港好 ,偶再勿去看勿是輸 8伊了嗎?為了跟老金鬥爭到底,阿拉乖乖搬隻小矮凳,坐樂該拿周立波看光:)
《笑侃三十年》吸引偶額,首先是伊額大量回憶。
格些六七十年代額生活場景對阿拉來港,是交關熟悉而親切額。小辰光,炒麥粉,儂吃過伐?用筷子串起幾根油條來,儂買過伐?刮香煙牌子,儂白相過伐?到鄰居窩裏廂排排坐看9寸電視機,儂去過伐?幫阿娘到小菜場裏去排隊,儂做過伐?8姆媽吃生活,儂嚐過伐?:)
再後來,八十年代,鄧麗君額靡靡之音,儂聽過伐?小姑娘穿額紅裙子,儂穿過伐?初中辰光,跟同學一道偷偷白相麻將牌,儂白相過伐?上海額舞廳,儂去過伐?翹倫、抽筋舞、霹靂舞,儂跳過伐?中國銀行、華僑飯店門口額打樁模子,儂碰到過伐?各種黃牛,儂打過交道伐? :)
所有額格些,隻有生活樂該上海灘額寧,才深有體會,有共鳴。周立波,就是立勒台高頭幫阿拉集體回憶,拿阿拉一道帶回到過去。生活,就是格能小市民,周立波就是因為喚起了廣大老百姓額對過去美好回憶額懷念,所以才能捉牢觀眾額心!
儂曉得伐,周立波?儂額笑點老多額,偶笑勒眼淚水流出來了,差點麵孔抽筋:)))
再港港周立波額語言特色。
上海閑話勿同於普通話,而且根本是一額是牛頭,一額是馬嘴,渾身勿搭界!:)大部分觀眾是上海寧,或者是聽得懂上海閑話額。伊額幽默,儂有辰光隻要稍微看伊壞兮兮額笑容,就可以體會到;伊額幽默,儂隻要聽伊港前半句,就能猜到後半句,格就叫心有靈犀:)伊額幽默,還要看伊模仿各種人物額腔調就會得笑。格就是周立波能夠樂該上海紅起來額關鍵。多少切口,才是阿拉生活中額口頭語,而隻有生活中額口頭語才是一種語言額生命。從某種意義上港,周立波也是樂該保護上海方言,保護上海本土文化勿被流失做貢獻額。
所以港,周立波,儂為上海寧紮台型噢!:)
周立波額學曆並勿高,偶刮著伊身上還有點白相寧額味道。伊因為滑頭,所以才能14歲就進入滑稽團;也因為滑頭,才能夠打瞎了丈人老頭額眼睛還花到比伊大6歲額老婆;還因為滑頭,伊還可以下海經商,欠了債還能夠翻身;因為滑頭,伊樂該合適額辰光進場,拿大家全部套牢!格額,也是伊額本事!白相,白相到伊格分上,就叫白相了老轉額!:)
周立波額竄紅,雖然離勿開京劇演員關懷額包裝跟商業炒作,但是,最主要額還是周立波額舞台魅力。就單單港,樂該台高頭一嘎頭港兩額鍾頭還是相當要有功力額。港額語氣要捉的牢觀眾,港額內容也要捉的牢。周立波跟小沈陽最大額勿同點,還樂該伊能夠深入到生活各額幺伲角落,涉及額話題相當廣泛,政治,時事,教育,經濟,文藝,體育,而每一額例子,伊總歸要諷刺一下,批評社會,帶點批判現實主義,格就相當難能可貴!小沈陽,最多是生活中額笑話,伊額調侃廣度跟高度遠遠勿及周立波。現在社會,還能有啥寧敢拿國家領導寧開刷?周立波做到了!
從格點港,周立波,儂是隻模子!
請閱讀更多我的博客文章>>>