搿兩日搭一個70後辣一道吃子一頓飯，迭個阿弟比我小脫廿六歲，辣辣一家中日合資個同行個公司裏搞營銷，其實我老早就認得伊了，一直唔沒好好叫吹牛皮，迭 趟吃飯，當子伊拉公司個中方總經理個麵，無天野地個吹子起來，講起15年前頭，剛剛從日本留學回來，到公司應聘、麵試、上班，一路講過來，我越聽越有味 道，邪氣發噱，今朝寫出來大家看看，搿題目就叫“日本海歸就業記”。
1997年，迭家中日合資公司還結辣辣籌建當中，搿阿弟看到公司個招聘廣告，按照廣告浪個電話號頭，打子過去，對方接電話個人事部長姓茅，後來到公司上班 之後，慢慢叫曉得迭個部長個綽號叫“茅估估”。茅部長辣辣電話裏問阿弟阿會日語，阿弟回答伊辣辣日本留學子四年，剛剛回來，日語唔沒問題。“搿沒儂到阿拉 公司來麵試，乃留學個資料一道帶來。”“搿沒捺公司那能走法？”阿弟問茅部長。“儂勿是剛剛走日本回來嗎？那能介戇個啦！一眼噱頭阿唔沒個，拉部差頭勿是 儕解決了嗎？”，阿弟一記頭悶脫。
按照約定個辰光，阿弟到公司先碰頭茅部長，邊浪坐子個日本人，毛六十歲，西裝筆挺，講閑話也老樂開個，日本人用日語問子幾個問題，看過子阿弟個資料，接下 來茅部長用上海閑話問阿弟，對工資收入有啥個要求，阿弟想子一想講：“一個月有五千塊，差勿多了。”“喔喲，派派還是日本留學生唻，也不過迭眼要求，辣辣 阿拉公司裏做，迭眼工資算啥個花頭啦？介狗屄倒糟個。”阿弟一聽，迭家公司勿推板末，“儂回去等通知伐，阿拉公司決定之後會通知儂個。”茅部長一刮兩響， 阿弟又拉子一部差頭回去了，一來一回，差頭銅鈿搞落脫一百多塊。
阿弟回去等子好幾天，唔沒茅部長個回音。阿弟隻好另外尋路子了，到一家日本人個化妝品公司應聘；倒也談來蠻好，也是叫阿弟回去等通知。唔沒 想著，隔手迭個茅部長電話來了，講公司個日本人對阿弟印象蠻好個，決定錄用，叫阿弟第二天就去公司報到。阿弟又想子一想，回答茅部長：“儂介幾天唔沒回 音，人家日本人個一家化妝品公司錄用我了，那能辦呢。”“哎，儂那能介拎勿清個啦？阿拉公司老正規個，儂當子錄取一個人介便當個啊？儂跟牢迭個日本人做下 去，勿要忒好哦！我隨便儂，要末明朝來報到，要末阿拉另外招人，想進阿拉公司個人勿要忒多哦。”，阿弟悶脫。
阿弟開始上班，公司還辣辣籌建，阿弟開始跟牢迭個日本師傅，營銷浪暫時也唔啥事體。阿弟個日本師傅叫“神木”，神木先生一介頭辣辣上海，唔沒啥事體，三天 兩頭拖子阿弟去酒吧，“搿段辰光乃上海個酒吧儕白相過了，酒吧個老板，老板娘儕認得我了……”“神木先生當時已經59歲，日本總部派伊到上海來，伊勿要忒 實惠哦，乃兩份工資，搿辰光個上海，酒吧開銷比日本勿曉得便宜多少，搿老跑街先生乃我當導遊派用場，不過憑良心講，搿幾個號頭，乃我一生一世個酒吧儕白相 忒了。”“搭伊吹吹牛皮，學著勿少公司裏個專業知識，勿然介後手來我也蠻難開展工作個。”阿弟迭能講。“神木先生回去之後，我每趟到日本出差，總歸要去望 望伊，帶眼伊歡喜個中國茶葉撥伊。”阿弟待師傅勿推板。
辣辣公司做滿子一個月，發工資個日腳，阿弟到銀行裏去拉卡，一看卡浪廂個數字，厥倒！卡浪隻打進來一千六百塊！隔手阿弟就尋茅部長講筋頭： “茅部長，儂勿是講撥我一個號頭五千塊工資個末？那能工資卡浪隻有一千六百塊？”想勿到茅部長篤悠悠個回答：“阿弟，儂勿要搞錯，公司還辣辣籌建，儂就想 乃五千塊工資？儂當老板是戇大？世界天浪有介好個事體？再講儂搞營銷個，現在又唔啥事體，天天辣辣白相，等到公司開工之後，工資就會漲上去個，儂辣辣日本 幾年，白白裏登個啊？”，阿弟徹底昏倒。“搭茅部長爭伐，兩個人已經熟了，弄勿好兩個人白板對煞。（最噱個是阿弟用普通話講個：白板對死。）”，“想想也 有道理，辣辣公司還唔沒投產個迭段辰光裏，跟牢子神木先生，學點本事，譬如參加培訓。再講伊歇辰光走日本剛剛回來，手浪廂還蠻寬裕個，也唔沒女朋友，搿能 就辣辣公司做子下去，一做就做到子現在，眼睛一霎十五年了。”
搿辰光我熬勿牢開口問了，迭個茅部長現在辣辣做啥？坐辣旁邊個總經理聽得笑煞脫了，接口講：“茅估估退休子兩年了，勿要講哦，伊第一批招進來個迭眼人，倒 是確實勿錯個，現在儕辣辣崗位浪。阿弟現在是營業部個頭，整個公司日本人隻挺下來兩個人了，其他儕是中國人了。”，我又熬勿牢搭阿弟講：“阿弟，下趟我請 儂吃飯，繼續聽儂吹，聽儂開大道，好好叫比聽周立波個‘海派清口’來得紮勁。”，“老法師，勿好意思哦，辣儂老法師麵前，我是‘關公麵前舞扡腳刀’啊！” 阿弟還來得個謙虛，我立起來搭伊碰脫子一小杯紅酒……
選擇“Disable on www.wenxuecity.com”
選擇“don't run on pages on this domain”
