我的祖父祖母--許家膩小姐

許家膩小姐是啥人？呶，老朱厄家主婆。


膩小姐厄爺是青浦大地主，不過伊拉一家們老早從青浦鄉下頭搬到上海租界裏相住了。反正鄉下頭厄地有人幫伊拉種，房子有人幫伊拉看。辰光一到，就有人送米送鈔票來了，涅節好過得弗是一眼眼。


膩小姐厄賣相邪氣好。讀中學厄辰光，有一天來馬路啷相踏腳踏車，被星探看中。膩小姐回到屋裏相誥伊拉爺一講，當場就被伊拉爺反鎖了房間裏兩日兩夜。第二天，星探來聽回音，被門房趕脫勒。


屋裏相有個嘎好看厄囡兒恩長大了，就弗太平了。上門提親厄人踏破許家厄門檻，最最要命厄是，還有上海灘老大厄徒弟也來軋鬧猛。膩小姐厄爺隻好托人去擺平，托來托去，弗曉得哪能，正好托到老朱厄爺。流氓擺平了，老朱厄爺順勢幫自家尼子提提親，直接省脫十八隻蹄膀。


膩小姐風風光光出嫁了。嫁妝就弗去講伊了，單單酒水就擺了三天流水席。嫁到老朱屋裏後，前後左右隔壁鄰舍就叫伊新嫂嫂。新嫂嫂叫了無沒幾年，就改叫許老師了。為啥道理？因為解放了，婦女翻身了，新嫂嫂經過培訓到小學做老師了。


接下來十幾年，許老師倒也弗是怨天怨地。比起娘家兄弟關牢監，自己男人還算無沒吃大苦頭。小學老師一做就做到光榮退休。退休以後，許老師吃過早飯打打太極，吃過中飯打打中覺，吃過夜飯打打麻將，交關樂惠。可惜老朱走得比伊早。


有一天，打過中覺，聽到有位老先生來樓下問：許家膩小姐啊住了該遝。伊從涼台上伸出頭一張，雖然過了幾十年，還是認得出厄。是伊厄高中同學，記得伊吃過二小姐厄喜酒無沒多少辰光就到美國去了。老先生上樓進門，朝牆壁上老朱厄遺像看了看。接下來，大家敘敘舊，老先生看看手表講明朝再來。


第二天，老先生來厄辰光帶了一束花，到底是洋派人。吃過茶，老先生開口了：“膩小姐，我今朝來是向儂求婚厄。我厄家主婆前幾年也沒了（看了一眼老朱厄遺像）。儂曉得伐，我讀書厄辰光就老歡喜儂厄，請儂考慮考慮。”伊對老先生講了點啥，無沒人曉得。反正老先生無沒幾天以後就回美國了。該一年，許家膩小姐整整八十有兩。



下集預告：俠氣出趟