儂好伐？

                                儂好伐？

弗曉得哪能，今朝老想儂，阿拉兩介頭有幾年唔麽看見啦？自從儂跟伊跑到新西蘭去後，我有8-9年唔麽碰著儂了，儂回去，我弗回去，我回去，儂又留在新西蘭。頂頂痛苦的辰光，我的外婆（儂的阿娘）去世，伊老人家頂頂歡喜的兩個孫囡，一個也唔麽送著終。後頭幾年，儂還記得伐？伊的魂靈頭尋到新西蘭，弄得儂整天哭哭啼啼的，人家講，要做做法事就好了，屋裏廂弗相信，結果儂一直弗好，後頭唔麽辦法，就讓小J去做做，過點辰光，儂真的好了；儂好了，輪著我，大概一年辰光，我每天夜到做夢，夜夜做著外婆，也是莫名其妙就哭，嘴裏一直講：“恨勿得明朝就買張飛機票回去。”也是一直弗好。後頭我回去辰光，到外婆墳郎廂去燒燒，再回來，嘿，就自己好了，儂相信也要相信，弗相信也要相信。

阿記得小辰光？儂打扮得像個小妖怪，人麽聰明得要死，閑話講弗清爽，乃“姑父”叫“功夫”。阿拉一直要笑儂，阿是要吃“功夫茶”啊？儂想要吃糖，又開弗開瓶蓋頭，乃了一把小榔頭，玻璃敲敲碎，就吃了，大人全看牢儂，呆煞了，哪能介皮的小姑娘啊？

有一天，儂想要看雞是哪能生蛋的，我領儂到河灘頭一家人家，外頭有隻老母雞正好勒該生蛋，儂急煞了，一定要我將蛋乃出來，我哪能辦？唔麽辦法，隻好用手乃半隻雞蛋一道幫忙拉出來，然後兩介頭捧了隻雞蛋拚命跑，做壞事體了，怕人家追出來。最後一趟碰著儂，阿拉兩介頭還講起這樁事體。

後頭阿拉兩介頭，全變成了歡喜孵在屋裏廂的文靜乖乖囡，儂比我還要文靜，一日弗講一句閑話都可以。兩介頭全歡喜著，會得打扮，記得阿拉兩介頭，一道走勒淮海路上，回頭率勿要忒高噢。咯種辰光老早一去弗複返了。

儂現在跟伊，發展得蠻好。阿拉兩介頭的婚姻，也是一開始大人弗看好的，結果現在大人全放心了。阿拉同樣的命運，全走得介遠，全在南半球，這趟回去，阿拉好碰頭了。

講不光的閑話，碰頭再談。

咯篇寫給我唯一的表妹，芸。

                                          

 31/10/2010於BS.AS.