上海灘的浜、灣、橋 （轉載）

　　上海本生是一個小縣城，清朝辰光，縣城垃拉現在個中華路人民路組成個環城河裏向，城外隻有小東門外、十六鋪一帶、黃浦江邊浪向還比較鬧猛，別個地方還是鄉下頭個樣子。上海地處江南水鄉，城裏城外河浜邪氣多，雖然講後來城市繁華起來了，交關河浜儕填脫了，但是留下來“浜”個地名、路名還是見證了上海個曆史麵貌。

　　喏，儂看，從南浦大橋下頭個陸家浜路朝西（經過徐家匯路），接牢肇嘉浜路，再過去接牢蒲匯塘（今漕溪北路），從“浜”“塘”個名字來看，說明搿幾條馬路老早仔儕是河浜，後來填浜成路了。老城廂裏向還有方浜（今方浜東、中、西路）、侯家浜（今侯家路），再遠一點個有薛家浜路、南塘浜路、諸安浜路、橫浜路咾啥【等等】，現在搿牌裏個【這種】河浜儕嘸沒了。有種介【有些】河浜填脫以後從路名已經看勿出伊拉老早是河浜了，譬方講洋涇浜，本生是英租界搭仔法租界個界河，從外灘到現在大世界個地方，北麵是英租界，南麵是法租界，填脫以後叫愛多亞路，現在叫延安東路。泥城浜，從蘇州河朝南一直到陸家浜（斜橋），填脫以後叫虞洽卿路，就是現在個西藏中路、西藏南路（部分）搭仔肇周路。

　　鄉下頭個河浜勿大會是筆篤直個，總歸有眼【有點兒】彎彎曲曲個，垃拉河浜打彎個地方就會留下來“xx灣”個地名，像上海本生有個盧灣區，現在是新黃浦區個一部分。伊叫盧灣區是得名於盧家灣，肇嘉浜朝東流過了打浦橋朝北彎了一彎再朝東，東接陸家浜，迭個打彎個地方就叫盧家灣。阿拉小辰光有一條2路有軌電車，就是從十六鋪開到盧家灣個。再看唐家灣，伊靠近老西門，搭泥城浜也有關係，泥城浜北起蘇州河（今泥城橋處），南接陸家浜，垃拉現在西藏南路轉到肇周路的地方彎了兩彎，我猜想附近姓唐個人家比較多，所以叫唐家灣。還有土山灣，垃拉現在個漕溪北路蒲匯塘路附近，清朝末年，當地疏浚蒲匯塘，挖出來個爛汙泥就堆垃拉河浜邊浪向，形成一座小土山，加上蒲匯塘又不是筆篤直個，有一點彎勢，所以就留下來一個土山灣個地名。

　　要講到橋，河浜多橋就多，老早仔上海個橋實在是行【hhang】情行事【非常多】，隨著河浜個填脫，有交關橋是“隻聞橋名，勿見橋影”。像提籃橋、八仙橋、南洋橋（今西藏南路自忠路附近）、斜橋，肇嘉浜路上頭個打浦橋、大木橋、小木橋、楓林橋、東廟橋（東安路老早叫東廟路）、謹記橋（宛平南路老早叫謹記路）、天鑰橋，延安東路上頭個鄭家木橋（福建路口）、東新橋（浙江路口）、西新橋（廣西路口）。再遠一眼的地方還有虹橋、楊家橋（今同濟大學滬西校區附近），浦東還有塘橋、金橋老啥，介許多橋阿是數也數勿過來。

　　地名是曆史個一麵鏡子，儂要歡喜上海，就要曉得上海個曆史變遷，儂講對哇？

伲屋裏住肇嘉浜浜南，沿肇嘉浜路從東朝西走，打浦橋大木橋小木橋楓林橋東廟橋謹記橋天鑰橋，其實我是一隻橋還沒有看到過，記得的全部是地名。倒是沿日暉港格平陰橋康衢橋，一直到去上山下鄉，迭兩座橋還辣辣格，現在當然是填特造房子了--轉載者注。