做留學生的差距咋就這樣大涅？ ZT by 油燜落蘇

格一腔看到網上一則新聞講兩個中國去加拿大讀書格小開勒海酒吧間幫幾個越南赤佬搞七撚三，隔手兩家頭就撥伊拉用槍弄死脫了！我勿曉得格樁事體到底是哪能嘎格，但是搞勿清爽為啥體嘎許多人惡狹狹格講迭兩個翹脫格小囡，反倒幫格幾隻越南赤佬叫好。隨便哪能，人死脫總歸是作孽格。裏廂一個小人格爺老頭子勒海追悼會浪廂格悼詞我阿看到了，阿真是前世裏作孽。老古話講：癩痢頭兒子自家好。小囡到底是身浪廂一塊肉，人沒了，鈔票再多阿無啥啥了。再講伊拉格把年紀，生勿生得出啊勿曉得。撥阿拉阿娘講起來就是：jinjin zeigo啊（真真罪過啊！）

勿管哪能，做爺娘格勿好太寶貝小人。啥格嘎小格小鬼頭就間奔駛，爺老頭子還講伊拉蹲了外頭吃了交關苦頭，困過地下室，etc，瞎三話四！到現在還拎勿清爽問題出勒啥地方，悶脫。勿曉得世界上還有多少迭能嘎賤格爺娘，認為歡喜小人就是要多撥伊鈔票，講到底就是壽啦！小囡闖禍講起來是天數，畢過爺娘從小沒做過規矩個小人總有一天要吃軋頭格。

兩個小囡阿有點壽頭怪氣，有銅鈿嘛為啥體要嘻嘎嘎露撥人家看呢？爺老頭子扒分阿不容易啊！聽講伊拉去一趟酒吧就吃脫500多加幣，還急吼拉吼搶了幫人家結帳，儂講壽伐？兩隻脫底棺材，那阿哥插那2塊澳幣一杯格咖啡阿隻聞過味道。而且阿拉娘講過，酒吧間儕是勿二勿三格人去白相格，好小人去了要軋壞道格。格點伊拉爺娘為啥體沒搭伊拉講過？阿是伊拉拿爺娘格閑話當屁彈過算數？

同樣是做人，差距為啥體嘎大呢？雖然有幫子有銅鈿人家格小人讀書爛糊三鮮湯，鈔票多的來一天世界，大部分留學生還是過勒邪氣做人家格。譬方講我，勿要講轎車，舊腳踏車阿是到跳蚤市場幫一個老頭子搗了半天漿糊才買下來格。蹲了澳大利亞，假使每天乘公交車去打工讀書，一個號頭格交通費阿要100多塊，想想阿嚇煞人，逃票撥捉牢搔頭格樣子儂講戇伐？

再講吃飯。當然是自家開夥倉咯！最對胃口阿最省鈔票格吃飯應該是熟泡麵了，假使講一箱箱買格閑話，價鈿隻比中國格貴一倍半。我覺著吃熟泡麵阿是有講究格。最浪費格吃法就是麵撈光，湯勿吃幾口就摜脫了，格能嘎而且又吃勿飽。我一般有兩種吃法：第一種是麵吃光後，擺塊飯進去，搗搗伊吃；還有種更加靈格辦法是光泡飯，麵留勒海做夜點心。另外，我勒海屋裏廂格辰光一般性一天兩頓飯，早浪廂10點半第一頓，夜到5點半一頓，要是吃格是熟泡麵格閑話，黯眼辰光還好有的一頓夜點心。要是去讀書或者打工呢，我就出門前頭一頓，中浪廂吃根香蕉，或者吃兩粒糖混過去算了，夜到到屋裏總歸要八、九點鍾了，覺著肚皮阿勿餓，大概是餓過頭了伐。

畢過閑話講轉來，日腳阿不好天天格能嘎過格，否則活了像隻眾生一樣，來班阿要稍微弄眼像樣點格物事吃吃格。格搭格店家歡喜打折頭，碰到打折格辰光，我會得買隻大眼格蹄膀。骨頭幫皮篤湯，肉切肉絲或者切丁。格能嘎阿好混兩個禮拜。另外奈，自家包點餛飩、餃子或者春卷阿是蠻讚格，人勿好懶格，特別是看了鈔票格麵子浪廂。看到其它便宜格副食品阿是要買點嗬，像2塊3kg一袋格橙，1塊以下1kg格香蕉，1塊600g一打格雞蛋看到了腦子勿動阿要買格。

外國還有點好處就是物事格價鈿分檔次，勿像中國像煞同一類物事格價鈿儕是差勿多格。Home Brand搭子Savings儕是阿拉窮學生子格毛主席！我勿曉得有銅鈿人家格小人一個月開銷要幾乎。反正我蹲了悉尼一個號頭大約摸亨不冷打加起來格閑話3000塊人民幣差勿多了。來班還好吃吃小老酒，呼兩根香煙，嗬嗬！