我的祖父祖母--老朱一世寧

老朱厄爺是上海灘上厄該銅締寧，鈔票莫牢牢。老朱出生厄辰光，伊拉爺已經四十出頭了，所以寶貝得弗得了。老朱是想要啥就有啥，隻要鈔票買得到。


老朱小辰光住勒虹口。來勒伊自家厄記憶裏，每天放學轉來，一幫子猶太小寧就盯牢伊，叫伊請客買零食吃。


有一天老朱來勒放學（可能已經讀中學了）路上，看到有一個外國寧踏了一部腳踏車。腳踏車龍頭上不是鐺鐺響厄鈴，而是吡吡叫厄喇叭。該個外國人喇叭一撳，旁邊厄車子統統停下來，交關牛庇。老朱回到屋裏要伊拉爺也幫伊去弄一部該恁介厄腳踏車白相相，伊拉爺拿勒大條子就直衝巡捕房。結果，當年上海灘上兩部該恁介牛庇厄腳踏車，其中一部就是老朱厄。


接下來，日本寧來了。國民黨裏相一位抗日將軍拔日本人追殺，老朱厄爺跟該位將軍交情弗是一眼眼。風聲最嚴厄辰光，將軍就來勒老朱屋裏亞了三天三夜。


虹口住弗下去了，老朱全家搬到租界。老朱厄爺邪氣愛國，抗戰八年，堅決弗跟日本人做生意。全家老小，帶娘姨賬房，統統坐吃。老朱該個辰光已經二十來歲厄樣子，正好來勒租界裏相上上洋學堂，跳跳“篷擦擦”，打打斯諾克。

好弗容易，抗戰勝利了。老朱書也“現”好了，婚也結脫了。新娘子弗僅人長得漂亮得弗得了，陪嫁也多得弗得了。除了金銀首飾外帶三套紅木家具以外，還有青浦良田數幾十畝。老朱要尋工作了，該個容易，就勒抗日將軍兄弟開厄銀行任職。


糊裏糊塗又是兩三年，老朱尼子也養好了。聽講共產黨馬上要來了，老朱也有點嚇絲絲。隨大流逃到香港（原計劃是經香港到台灣），待了半年弗到就回上海了。香港該種鄉下頭，象老朱該恁厄小開是登弗慣的。回到上海，丈人老頭厄田已經土改改脫了，無沒多少辰光，伊拉自家爺厄船物公司也公私合並脫了。全家老小，三代同堂再次坐吃。娘姨，賬房老早回頭脫了。


坐吃也弗是辦法，老朱跟家主婆隻好去失業登記站登記。共產黨真是火眼金睛，一記頭就發掘出伊拉厄長處。老朱分配去工人文化館，反正白相是老朱厄強項。伊拉家主婆培訓一歇，分配去小學教教畫圖，唱歌。有鈔票人家小姐，啥人無沒彈過鋼琴呀。


接下來十幾年，老朱就基本上無沒過過好日節。抄家，批鬥是肯定逃弗脫。無沒送伊到提籃橋已經牢客氣了。以致到老朱晚年，中國已經進入改革開放厄年代，伊還是常年穿運動衫。有句閑話說得好：過去厄就讓伊過去伐。不過，老朱卻弗能釋懷。退休之後，每趟講到伊厄後半生，總會伴著三水（眼淚水，鼻涕水，饞吐水）同流，長歎一聲：“我現在是來勒吃官司啊。”



下集預告：許家膩小姐