“勿像腔”搭仔“勿入調”（滬語） (原載上海東方網)

辣辣社會浪做人，總歸要有根底線。進進出出要有個腔調，一個最基本個腔調。勿一定穿得西裝筆挺、濃妝豔抹，啥個場合啥個穿法；紅白喜事勿可能穿汗衫短褲、三點式，進遊泳池也勿好穿風大衣、禮服；最近天氣熱到38度，登辣屋裏向可以馬虎，也勿至於赤膊赤屁股，男男女女儕會把握分寸；搿槍網浪因熱而熱個熱議之一，就是公共場所，特別是公交車、地鐵浪個“鹹豬手”、“性騷擾”，搿種情況過去一直發生，不過名稱勿同，老早子叫“耍流氓”。

阿拉年紀輕個辰光，乘公交車是有規定個，好像主要是針對男人：穿嘸沒袖子管個衣裳，比方講背心；下身穿內褲，勿是西裝短褲；腳浪穿拖鞋者，是勿好乘公共汽車、電車個。伊歇辰光女同胞穿得保守，就嘸沒必要去規定了。現在勿對了，男人還是穿得中規中矩，女小囡、女人個裙子呢，越穿越短；女孩喜歡熱天，原因就在於可以盡情涼快：裙擺搭膝蓋個距離遠遠超過廿公分，恨勿得搭三角褲並駕齊驅。袒胸露背勿稀奇，上身裸露辣光天化日下頭個皮膚麵積，甚至超過90%……

搿搭有一點要提請注意，假使講辣辣“夜店”裏，假使講辣辣沙灘浪，下頭穿得再短，上頭穿得再少、再薄，勿會有人講儂“異樣刮搭”；“妖女”、“辣妹”出入其間，不足為怪。辣辣公交車、地鐵浪，特別是乘客擁擠個高峰時段，軋得來前胸碰著後背，乃末弄勿清爽唻：“勿入調”個男人趁機會“揩油”、“吃豆腐”、“出外快”，穿得“勿像腔”個“美女”，原本隻想吸引眼球個，“惹火”仔缺乏定力個“騷”男人，一個是哇啦哇啦叫“色狼”，一個是聲辯“勿是故意個”，一時間青紅皂白難分。

搿種情況還辣辣繼續，一個是“勿像腔”，一個是“勿入調”，南腔北調嘸沒腔調。倘使是“資深美女”，出得門來長裙及踝，該裸露處且裸露，婉約大方個打扮，大約不至於到“惹火”個程度；“愛美之心，人皆有之”，足以讓男人們充分發揮想象力，迭個就是女人個腔調。而穿得搿能介“涼快”，還要軋公交車、地鐵，男性乘客唯恐躲之而不及，乘客擁擠個辰光哪能辦？以“美女”為圓心，劃一圈一米線？

討厭就討厭辣啥地方呢，“勿入調”個男人死勿光。看見仔“美女”熬勿牢，“骨頭輕”，人家是有生命個高級動物，勿是新世界蠟像館裏個蠟像。隻好隔開空間遠遠欣賞，絕對勿作興動手動腳，拖儂到派出所裏去，搿辰光就曉得成本忒高，儂乃人家當儂女朋友啊！盡管人家穿得“勿像腔”，儂絕對勿可以“勿入調”，搿就叫社會準則，搿就是做男人個底線，勿相信儂試試看。稍微提升一點講，最近上海男人“被”評為“怕老婆”全國第一，其實是尊重女同胞做得最好。男人應該有眼紳士風度，退一萬步來講，即便是人家“鮮格格”，男人家也勿要“骨頭輕”。

行文至此，撥公交車、地鐵一個建議：針對目前搿種情況，是勿是需要乃老早子個“規定”重新翻出來，搭乘公交車、地鐵個乘客，對男人搭女人個衣著，作出一個切實可行個新規定，穿拖鞋、高跟鞋就勿要管伊了。公共交通勿是T台，勿是作秀個舞台，勿管男人女人，讓穿得忒涼快個朋友去走路，或者是乘出租車，勿要影響大多數中規中矩個乘客。與其花勿少精力處理“性騷擾”事件，還勿如廣泛吸收群眾意見，製訂一套保障社會文明個規矩出來，現有個地鐵安檢搭仔公交車駕駛員，有權攔阻衣著不符規定個乘客進站、上車。