啥是上海人？

啥是上海人？

看到小鳳凰厄《上海人，外地人》，覺著還是蠻客觀厄好文章，雖然俄勒厄觀點頗弗相同。同時，望文及義，首先一個問題，啥個叫上海人，以及小鳳凰自稱厄地道厄上海人?

粗看,該個叫啥問題。有人講，戶口簿上寫了，我是上海人。Ok，該算第一層上海人厄定義，戶籍上海人。但是該個就有點像US citizen。來勒該遝弗少人，拿了綠卡，入了美籍，也就是因為該遝生活好一點，政治清明一點。當地人也曉得，you are US citizen, you are not American。一旦形勢變了，伊拉就會得卷鋪蓋跑路，弗會更美國共進退。即便來勒美國生活了大半生，黃土到頭頸了，還可以宣稱一顆中國心，回去混吃混喝，騙騙小姑娘（當然，某媛是弗是小姑娘，此地就弗便鑒定了）。備受某些人推崇厄外地精英，也可類與此。

又有人講了，我來勒上海土生土長，我是地道厄上海人。該可以算是上海人厄生理論，或者叫physical Shanghainese。但是現在厄小囡，連上海言話儕弗會講，開口閉口打官腔，北京一招手，伊拉厄魂就跟了跑了。前一晌風光厄上海幫，其實無沒一個土生土長厄地道上海人。但是就算調了現在地道厄上海小囡，又哪恁？

閑話講轉來，啥個叫土生土長？來勒上海人口裏相，往上數三代，90%以上儕弗是上海土生厄。挺下來10%弗到厄上海土著，享有一個專稱：本地人。我內子厄家族可忝列其中。但是我內子弗是上海人，為啥弗是？曆史原因，弗便展開。但是伊對我厄啟示就是，一個人弗認同上海價值，弗欣賞上海文化，包括上海言話，伊就弗是上海人。（幸運厄是，內子弗通吳語，但是能讀懂超語言厄我）。

反之，一個人，弗論伊厄出身、背景，隻要伊認同上海，自願接受並學習上海文化，會得講上海言話，伊就是上海人。相對拿了上海戶口，登了上海Office裏相，一口京片子厄所謂外地精英，我更加認可《九十年代初的上海》裏相厄蘇北新婦。居陋巷，粗衣淡飯，一口蘇北上海言話。伊就是上海人！伊厄子女後輩，會成就地道厄上海人。