假設儂看到一個上海人辣辣早浪廂用開水淘昨日個冷飯頭, 用迭樣做早飯, 味道嗲得勿得了一樣, 謝謝儂勿要看伊勿起, 因為迭個是的的括括個具有上海地方特色個早飯, 為啥? 又省銅鈿又省辰光. 辣上海, “蕩馬路”是相當多個人下班後, 周末雙休日腳最流行個白相方式, 為仔啥? 老早是為了屋裏地方小, 蕩馬路又勿用出鈔票. 如果一個小青年讓小姑娘喊搭去蕩馬路, 當心點, 小姑娘相中儂了. 走親戚做人客, 定規要帶點物事, 否則說話要太坍台個, 儂一到人家屋裏, 總是先要隨便講特幾句閑話啥個”有日叫嘸沒碰著儂了, 身體好伐忙伐”等等, 然後再進屋裏作下來, 一般有隻把兩個陪客, 陪儂講講閑話, 解解厭氣. 作人客吃飯辰光, 主人家嘸沒坐下來個辰光, 儂千萬勿要動筷子, 等到主人坐下來了, 開始講”吃啊吃啊”, 那末儂可以吃了. 人客還嘸沒吃好老酒, 主人家勿會開始吃飯. 吃好仔, 主人家勿會讓人客收作碗盞個, 自家弄好後那末擺出香煙水果糖瓜子啥. 人客辣辣個辰光, 主人家勿會罵更勿會打自家小人, 迭樣就好像是打罵給人客看個了, 人客嘸沒走還勿會掃地, 迭樣還會讓人誤會掃地出門了. 人客告辭辰光, 主人家會搭至少送到弄堂口(如果是弄堂說話), 客氣點個還會送到車站甚至送到人客上車. 辣上海吃人家結婚酒水辰光, 開始了儂要記牢搭至新郎倌新娘子講點比如”百年合好”啦”白頭到老”之類個好聽祝福閑話. 酒水吃特大約摸一半個辰光, 新娘子要換衣裳(一般要換三套), 那末搭至新朗倌一道一桌一桌去敬酒, 新娘子還要特客人點香煙. 才記牢, 迭個辰光作為客人儂一定要大大方方, 勿好推三推四個, 否則新郎新娘屋裏人會勿開心個. 上海現在個習慣等已經搭至老底子勿大一樣了, 時代變化了, 人還辣辣變, 客套閑話一樣會搭跟辣變個, 祖宗個風俗習慣勿一定需要繼承下去, 雖然還是有相當一部分人仍舊欣賞老法海派, 講究排場, 看上去是蠻風光個, 不過呢市麵撐過之後算銅鈿個辰光發覺空了不少債, 迭個就勿好白相了. 其實真正見過世麵個人, 就真個會搭量力而行個. |
